يا ترى إيه اللى ممكن يخلّي مُصدّر صيني كبير يفكر ينقل مصنعه من الصين لمصر؟ وليه الشركات الصينية بتبص على مصر تحديدًا كحل لمشاكلها مع الرسوم الجمركية الأمريكية؟ وأهم من كده إيه اللى هتستفيده مصر لو الخطوة دي فعلًا حصلت؟
مصدّرين صينيين كبار زي شركة "بيفا" .. اللى بتصنّع أقلام وأدوات مدرسية وبيعملوا مبيعات سنوية بـ60 مليون دولار في أمريكا لوحدها .. بيفكروا ينقلوا مصانعهم لمصر .. ليه؟ عشان يهربوا من الرسوم الجمركية الضخمة اللى فرضها الرئيس الأمريكي دونالد ترامب .. الرسوم دي وصلت لـ145% على المنتجات الصينية .. ومع الرسوم القديمة .. بقت حوالي 156% .. يعني لو شركة زي بيفا عايزة تواصل تصدير لأمريكا .. هتخسر كتير جدًا بسبب التكلفة العالية دي.
الصين طبعًا ما سكتتش.. وضربت رسوم جديدة بنسبة 125% على السلع الأمريكية.. وده خلّى الوضع يتعقد أكتر.. الشركات الصينية زي بيفا لقوا نفسهم في مأزق.. إما يخسروا السوق الأمريكي اللى بيمثّل نسبة ضخمة من مبيعاتهم .. إما يلاقوا حل تاني .. وهنا بقى ظهرت فكرة مصر.
طب ليه مصر بالذات؟
أول حاجة .. مصر عندها عجز تجاري مع أمريكا .. يعني بتصدّر لأمريكا أقل مما بتستورد منها .. وده بيخلّيها بعيدة عن عين ترامب وإجراءاته الجمركية .. الرسوم اللى فرضها ترامب على مصر كانت بس 10% .. يعني لو بيفا نقلت مصنعها لمصر .. هتقدر تصدّر لأمريكا بتكلفة أقل بكتير مقارنة بالصين .. ده غير إن مصر موقعها استراتيجي .. قريبة من أوروبا وإفريقيا .. يعني الشركات الصينية ممكن تستغل المصانع في مصر مش بس عشان أمريكا .. لكن كمان عشان تدخل أسواق جديدة زي السوق الأفريقي اللى مليان فرص.
مش بس كده .. مصر بتقدم حوافز كبيرة للمستثمرين الأجانب .. زي المناطق الاقتصادية الخاصة والإعفاءات الضريبية .. ده غير إن تكلفة العمالة في مصر أقل بكتير من دول تانية زي فيتنام اللى كمان بتفكر فيها الشركات الصينية .. يعني لو بصينا على الصورة من زاوية تانية .. مصر بقت زي المحطة الآمنة اللى بيهربوا إليها المصدّرين الصينيين عشان يحافظوا على أرباحهم.
طيب .. إيه اللى هتستفيده مصر من الخطوة دي؟
أول حاجة الاستثمارات الصينية هتخلّق آلاف فرص العمل .. وده هيأثر إيجابي على الاقتصاد المصري .. كمان هيزوّد الصادرات المصرية .. خصوصًا لو المنتجات اللى بتتصنع في مصر بقت تتصدّر لأمريكا وأوروبا .. وأهم من كده .. نقل التكنولوجيا .. لما شركة زي بيفا تيجي تفتح مصنع في مصر .. هتجيب معاها خبرات وتكنولوجيا متقدمة .. وده هيساعد في تطوير الصناعة المحلية.
بس فيه تحديات برضو .. نقل مصنع من الصين لمصر مش حاجة سهلة .. محتاج بنية تحتية قوية واستقرار سياسي واقتصادي .. وكمان الشركات الصينية هتحتاج وقت عشان تتأقلم مع السوق المصري وطريقة العمل هنا .. بس لو نجحت الخطوة دي .. هتكون مكسب كبير للطرفين .. مصر هتستقطب استثمارات أكتر .. والشركات الصينية هتقدر تواصل بيع منتجاتها لأمريكا من غير ما تخسر.
اللي بيحصل دلوقتي هو جزء من لعبة اقتصادية عالمية كبيرة .. مصر بتحاول تستغل الفرصة دي عشان تقوّي مكانتها كمركز صناعي واستثماري .. والشركات الصينية بتدور على أي طريقة تحافظ بيها على مكاسبها .. ياترى هتكون مصر فعلًا الملاذ الآمن للمصدّرين الصينيين؟ .. ولا التحديات هتكون أكبر من الفرص؟
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
